اعرف جمهورك من خلال 5 أسئلة
هلا بك
في البداية أبيك تفكر معي وتسبح في خيالك شوي .. !
أحمد موظف في قسم المبيعات لأحد شركات الأدوية .. أول ما وصل للدوام معه القهوة وشايل شنطته على ظهره ولابس الشوز الرياضي ومروووق على الآخر .. جاه مديره وقال له : أحمد أبيك تجهز عرض وراح تقدمه نهاية هالأسبوع أمام رئيس الشركة ومجموعة من الأشخاص معاه ..
بدأ أحمد يجهز لهذا العرض ويجمع المحتوى وأضاف لمساته السحرية ! .. وجهز وطبع بعض المطبوعات الهامة .. وكل شيء زي الفل ..
جاء يوم نهاية الأسبوع ووصل أحمد لمكان تقديم العرض في وقت مبكر تأكد إن البروجكتر شغال مضبوط وكل شيء تمام ولا فيه مشاكل …
حتى الآن كل شيء جميل وحلو !
أحمد كان جالس في الغرفة داخل ينتظر يجي دوره في التقديم .. أول ما سمع اسمه راح وخرج للجمهور ، وهنا اكتشف أول مفاجأة له !!
كان العدد أكثر بكثييييير مما توقع ( كانوا حاولي ٣٠ شخص وهو متوقع ٥ بالكثير ! ) ، فورط في المطبوعات لأنه طابع ١٠ نسخ بس !! ..
تتوقعون انتهينا ..! لا لسا باقي .. بدأ أحمد بالعرض وكان مجهز عرضه بالإنجليزي .. لكنه اكتشف بعد وقت إن تقريبا أكثر من نصف الحضور ما فهموا معه أي شيء ! ..
وكل شوي يكتشف أحمد مشكلة جديدة وبلوة جديدة مع الجمهور ومع الحضور .. وكللللل هذا بسبب أنه :
!لم يعرف منهم جمهوره
هذه المشكلة تصير لنا كثير .. وخاصة إذا كان العرض اللي راح نقدمه قريب جدا وفي وقت ضيق .. أو إن فيه شخص من الحضور خايفين منه .. أو إنك واثق من نفسك فوق اللزوم وتتوقع إنك ما تحتاج إنك تسأل عن جمهورك ؟!!
وهذا راح يوصلك إلى نتائج سيئة .. ( جعلك ما تطيح في وحده منها ) مثل : إنك تتوقع إن الحضور شباب وتكتشف إنهم أطفال وأنت مجهز محتوى ما يناسب الصغار ! .. أو أنت مجهز نكتة على نادي رياضي معين وتكتشف إن ثلاث أرباع الحضور مشجعين لهذا النادي ..! وخذلك من المشاكل ما الله بها عليم …
وحتى تتجنب هذا كله ؟!
هذه خمس أسئلة اسأل نفسك عنها واسأل الشخص المنسق معك لهذا العرض عنها أيضا :
السؤال الأول : كم عدد الجمهور أو الحضور ؟
راح تستفيد من الإجابة :
كيف راح توزعهم ؟
هل راح تفتح مجال للأسئلة ؟
وش وضع التكييف في القاعة ؟
كم راح تطبع إذا كان فيه مطبوعات ؟
هل تحتاج مكبرات صوت ؟
السؤال الثاني : وش يعرف الجمهور عنك ؟
راح تستفيد من الإجابة :
هل تحتاج تتكلم عن نفسك في البداية بشكل مفصل ؟
هل تحتاج إنك تحسن سمعتك عندهم ؟
إذا يعرفون إنك متميز فهذا يعني إنك لابد ما تخيب ظنهم !
هل تحتاج تبدأ بداية صاخبة وقوية ؟
هل أقدر ابدأ بنكتة ؟ .. أو أبدًا ما أقول نكت في العرض ؟!
السؤال الثالث : وش يعرف الجمهور عن الموضوع اللي راح تقدمه ؟
راح تستفيد من الإجابة :
هل تحتاج تتكلم عن أساسيات الموضوع بالتفصيل ؟
هل تحتاج تقنعهم بالموضوع لأنهم معارضين له ؟
هل تحتاج تذكر مراجعك ومصادرك أثناء العرض ؟
هل تتلكم عن الموضوع بشكل نظري أو تتكلم عن تجربتك ؟
السؤال الرابع : هل الجمهور يعرفون بعض ؟
راح تستفيد من الإجابة :
وش المواضيع اللي تسبب مشاكل بينهم ؟ ولازم تتجنبها ..
هل تقدر تسوي تمارين وألعاب جماعية ؟
كيف تتجنب السواليف الجانبية فيما بينهم ؟
هل فيه مواقف حصلت بينهم تقدر تستفيد منها في العرض ؟
وش الشيء اللي يجمعهم وعرفهم في بعض ؟
السؤال الخامس : هل فيه أشخاص من الحضور هم صانعين القرار ؟
راح تستفيد من الإجابة :
وش الوسيلة الأفضل لإقناعهم ؟
وش الأشياء اللي يكرهونها ؟
وشهي اهتماماتهم وهواياتهم ؟
هل تقدر تستخدم أسمائهم وألقابهم أثناء العرض ؟
وين راح يكون مكان جلوسهم ؟
إذا جاوبت على هذي الأسئلة الخمسة .. أضمن لك راح يكون عندك تصور ممتاز جدًا عن جمهورك !
وفالك التوفيق في حياتك العلمية والعملية وتذكر دااااااااايما …
